Deezer-ը թույլ կտա որոնման արդյունքներից անջատել AI-երաժշտությունը

Deezer-ը հայտարարել է նոր գործառույթի ներդրման մասին, որը թույլ կտա ունկնդիրներին որոնման արդյունքներից ամբողջությամբ հեռացնել արհեստական բանականությամբ ստեղծված երաժշտությունը։ Հատուկ անջատիչը հասանելի կդառնա մինչև 2026 թվականի ավարտը՝ հնարավորություն տալով բացառել սինթետիկ թրեքները, ալբոմներն ու համապատասխան էջերը։

Ըստ սթրիմինգային ծառայության տվյալների՝ հարթակն օրական ստանում է մոտ 90,000 լիովին AI-գեներացված ստեղծագործություն, ինչը պիկային օրերին կազմում է բեռնումների ավելի քան կեսը։ Դեռևս 2025 թվականի սկզբից ընկերությունը սկսել էր նշագրել նման բովանդակությունը և խմբագրական երգացանկերից ու ալգորիթմական երաշխավորություններից արդեն դուրս է մղել ավելի քան 42 միլիոն սինթետիկ թրեք։

Deezer-ի փոխանցմամբ՝ թեև AI-երաժշտությանը բաժին է ընկնում լսումների ընդամեն 1-3%-ը, 2025 թվականին դրանց գեներացրած սթրիմների մինչև 85%-ը եղել է ֆրոդային և զրկվել ռոյալթիների վճարումից։ Նոր կարգավորումը վերաբերում է միայն ամբողջությամբ գեներատիվ մոդելներով ստեղծված նյութերին և չի սահմանափակում մարդկանց կողմից ստեղծված այն երաժշտությունը, որտեղ կիրառվել են AI օժանդակ գործիքներ։