Ruben Antonyan

Ռուբեն Անտոնյանը ծնվել է 1988 թվականին Երևանում։ Կոմպոզիցիա է ուսանել Երևանի պետական կոնսերվատորիայում՝ պրոֆեսոր Արամ Սաթյանի ղեկավարությամբ, և 2014 թվականին ավարտել այն՝ ստանալով բակալավրի աստիճան: Նույն տարում տեղափոխվել է Գերմանիա, որտեղ սկսել է հաճախել պրոֆեսոր, դոկտոր Մանֆրեդ Շտանկեի կոլոքվիումներին և սեմինարներին, պրոֆեսոր, դոկտոր Գեորգ Հայդուի (Soundscape) և Սաշա Լինո Լեմկեի (երաժշտության տեսություն և վերլուծություն) սեմինարներին՝ Գերմանիայի Համբուրգ քաղաքի Երաժշտության և թատրոնի բարձրագույն դպրոցում (ակադեմիայում):

2015 թվականին մասնակցել է «Մշակութային ընկերություն» (Cultural Society) կազմակերպության արվեստի 3-րդ ամառային ակադեմիային, որտեղ ներկայացրել է իր «Դաշնամուրային երեք պիեսները»՝ գրված Ռոբերտ Մազերվելի կտավների հիման վրա։ Նրա ստեղծագործությունները հնչել են մի շարք միջազգային փառատոներում, ինչպիսիք են՝ «Music In Touch» (Կալիարի), «Crossroads» (Երևան), «Risuounanze» (Ուդինե), «Opus 3» (Երևան/Մյունխեն), «Loop» (Բրյուսել) և այլն։ Նրա վերջին ստեղծագործությունը, որը կոչվում է «M'Spiration» մենակատար ալտի համար, ընտրվել է հնչելու «Մոնտեվերդին և ժամանակակից երաժշտությունը. նախագիծ իտալացի երաժշտի ծննդյան 450-ամյակի կապակցությամբ» համերգի ընթացքում։ Այս մենանվագը կատարել է Մաուրիցիո Բարբետտին (ալտ) Իտալիայի Միլան քաղաքում։